A jam shtatzënë? Të njohësh shenjat e shtatzanisë nuk është edhe aq e lehtë sa mendohet pasi gruaja mund të mendojë se bëhet fjalë edhe për shenjat e para të ciklit menstrual.
Këshilla që mjekët japin në këtë rast është të vëzhgoni me kujdes të gjitha sinjalet që trupi ju jep si edhe të kuptoni të gjitha ndryshimet që ai pëson.
Ja si të kuptojmë shenjat e shtatzanisë:
Ngjitja e embrionit në mitër ndodh zakonisht pas rreth 8-10 ditësh dhe pasi ai është implantuar në mitër do të lirohen hormone nga organizmi i nënës, të cilat janë hormonet e shtatzënisë dhe do të rritet niveli i tyre nga dita në ditë.
I gjithë ky ndryshim ndodh pas 4-5 javësh nga cikli i fundit dhe në këtë kohë do të fillojnë të shfaqen edhe shenjat e para të shtatzënisë. Megjithatë në disa raste të rralla gruaja mund të mos ndiejë asnjë ndryshim në trupin e saj.
Gruaja do të ndiejë:
• Mungesa e ciklit. Kjo është shenja e parë që duhet t’i kushtoni rëndësi. Zakonisht në momentin e implantimit të embrionit në mitër mund të vërehet pak gjakdedhje e cila është gjithashtu një prej shenjave të para të shtatzënisë.
• Simptomat fizike. Mund të vihet re një ndjesi fryrje barku, dhimbje si të ciklit, ndjeshmëri e madhe e gjoksit etj.
• Simptomat psiko-emocionale. Vihet re irritim, ndryshime humori, kriza të qarash, melankoli.
• Temperatura bazale. Do të rritet temperatura e trupit e cila do të shkojë rreth 37 gradë.
• Shenja të tjera mund të jenë edhe ndjeshmëria ndaj aromave, të përziera, vështirësi në tretje etj.
Nëse mendoni se jeni shtatzënë mund të bëni një test shtatzënie ose analizë e cila do të jetë më e saktë.